הערליכע מעמד חומש סעודה אין תלמוד תורה עבודת משולם פייש ד'טאהש - מאנסי
"אשרי עין ראתה תינוקות של בית רבן שמחים בשמחת התורה". מיט די ווערטער איז פאסיג צו באריכטן די געהויבענע מעמד נהדר "חומש סעודה" וואס איז פארגעקומען בקרב מוסדותינו הקדושים אין מאנסי, דעם פארגאנגענעם זונטאג שלח העעל"ט ווען די לעכטיגע קינדערלעך פון כתה א' האבן געפראוועט דעם התחלת לימוד תורה שבכתב מיט א פרייליכע שטימונג.
צו דעם באשטימטע צייט זענען זיך צוזאמען געקומען די חשובע הורי וזקני חתני התורה, וואס זענען געקומען זיך משתתף זיין בשמחתם פון זייערע לעכטיגע קינדערלעך. ווען אפאר מינוט דערויף האט מען געהאט די זכי' צו מקבל פנים זיין דעם רעיא מהימנא קדישא כ"ק מרן רבינו שליט"א נשיא המוסדות, וואס איז זיך געקומען משתתף זיין ביי די גרויסע שמחה פון זיינע לעכטיגע תלמידים וואס זענען שטענדיג קרוב ללבו הטהור.
דערנאך האט מען מקבל געווען די לעכטיגע חתני המקרא וואס האבן זיך אוועק געשטעלט אויף די ספעציעלע פלאטפארמע, וואס איז געוועהן הערליך אהער געשטעלט ווי עס פאסט פאר אזא הייליגע מעמד.
די לעכטיגע קינדער האבן אנגעפאנגען מיט די ניגונים וואס זיי האבן איינגעחזר'ט וואכן לאנג צו זיין גרייט צום געהויבענעם מעמד, ובפרט די הערליכע אידישע אהבה רבה ניגון וואס דער מלמד שליט"א האט מחבר געוועהן דערויף הערליכע חרוזים.
דערנאך האבן זיי געלערנט די הייליגע חומש אנגעפירט דורך די געטרייע און איבערגעגעבענע מלמד מומחה הרב חיים ראטטענשטיין שליט"א וואס האט אריינגעלייגט גרויסע כוחות אז די לעכטיגע קינדער זאלן אנקומען פולקאם גרייט צום געהויבענעם מעמד.
מען האט געהערט א רייכע דרשה לכבוד המעמד דורך הגה"צ אב"ד קהלתינו הק' שליט"א, וואו די רב האט ארויסגעברענגט די גרויסקייט פון די הייליגע מאורה ווען מען קומט זיך צוזאם צו אפצייכענען די געהויבענע מאמענט, ווען די לעכטיגע צאן קדשים פאנגען אן צו לערנען די הייליגע תורה שבכתב, און אזוי אויך זיך באדאנקט פאר די געטרייע מלמד וואס זיין שם הטוב הולך לפניו אינעם גאנצ'ן שטאט.
דערנאך זענען אלע חתני המוקרא ארויס אין א טאנץ מיט זייער חשובע עלטערן לויבן און דאנקן דעם אייבערשט'ן אז ברוך השם מען האט דערגרייכט צו די געהויבענע צייט.
צום לעצט זענען אלע חשובע חתני המקרא דורך אל מול פני הקודש, ווען כ"ק מרן רבינו שליט"א האט פארטיילט פאר די לעכטיגע קינדער די הערליכע 'ספר תהלים עבודת משולם פייש' און אנגעוואונטשן ווארימע ברכות אז זיי זאלן ווייטער שטייגן מעלה מעלה בתורה ויראת שמים און פארשאפן אסאך נחת פאר די חשוב'ע עלטערן.
עס איז איבריג אויסצופירן אז ווער עס האט נישט מיטגעהאלטן די געהויבענע מאורע קען מען אים עס נישט מסביר זיין, די הערליכע און גייסטרייכע מעמד הוד וואס האט זיך אפגעשפילט. און עס איז צום האפן אז די חשוב'ע חתני המקרא זאלן ווייטער שטייגן מעלה מעלה בתורה ויראת שמים אויפן הייליגע דרך המסורה.
בילדער
|
